Өнөөдөр /2018.09.05/ нийгмийн даатгалын шилдэг шимтгэл төлөгч, ажил олгогч нарт хүндэтгэл үзүүлэх арга хэмжээ Нийгмийн даатгалын ерөнхий газарт боллоо.

2017 онд нийгмийн даатгалын тухай хуулиар хүлээсэн үүргээ нэр төртэйгээр биелүүлэн, ажиллагсдынхаа нийгмийн баталгааг хангаж, хамгийн их шимтгэл төлөн, нийгмийн даатгалын сангийн орлогыг бүрдүүлэхэд үнэтэй хувь нэмэр оруулсан шилдэг 15 ажил олгогчийг шалгаруулсан юм.

Шилдэг ажил олгогчоор Эрдэнэт үйлдвэр ХХК, Энержи ресурс ХХК, Мобиком ХХК, Хаан банк, Чингис хаан олон улсын нисэх буудал, Ус сувгийн удирдах газар, Дарханы дулааны цахилгаан станц ТӨХК, Дорнод бүсийн эрчим хүчний систем ТӨХК, Хшиг арвин индустриал ХХК, Трансвест монголиа ХХК, Монкон констракшн ХХК, Сүхбаатар вагон депо, Баялаг-Өлзий ХХК, Багануур зүүн өмнөд бүсийн цахилгаан түгээх станц ТӨХК, Илт гоулд ХХК зэрэг аж ахуйн нэгжүүд шалгарч, хүндэт өргөмжлөлөө гардан авлаа.

Нийгмийн даатгалын шимтгэл төлөгч 43000 ажил олгогчоос шилдгээр нэрлэгдсэн эдгээр байгууллагуудын тугийг жилийн турш нийгмийн даатгалын ерөнхий газрын өмнө мандуулан алдаршуулахаас гадна цаашид тухайн байгууллагаас томилогдсон бие төлөөлөгчөөр дамжуулан нийгмийн даатгалын байгууллага хүлээгдэлгүй шуурхай үйлчилж, хамтран ажиллах юм.

Ажилтан албан хаагчдынхаа нийгмийн баталгааг хангах үйлсэд  манлайлсан шилдэг ажил олгогч нартаа талархал илэрхийлж, амжилт хүсье.