Бүгд найрамдах Мьянмарын Холбооны Улсын Ерөнхийлөгчийн Тамгын газар Засгийн газар болон бүх шатны гүйцэтгэх засаглалын төлөөлөл, Мьянмар улс дахь НҮБ-ын Хөгжлийн хөтөлбөрийн суурин төлөөлөгчийн газрын төлөөлөгчид нийлсэн 37 төлөөлөгч манай улсад Төвлөрлийг сааруулах засаглалыг дэмжих НЭГ ЦОНХНЫ ҮЙЛЧИЛГЭЭ төслийг Монгол улсад хэрэгжүүлсэн үр дүнгийн талаар туршлага судлах зорилгоор албан айлчлал хийж байна. Энэ хүрээнд нэг цонхны үйлчилгээ амжилттай нэвтрүүлсэн төрийн байгууллагуудын үйл ажиллагаатай танилцаж буй ба өнөөдөр /2015.06.25/ Засгийн газрын хэрэгжүүлэгч агентлаг Нийгмийн даатгалын ерөнхий газар дээр ирж танилцах уулзалтанд оролцов.
Уулзалтанд Мьянмарын төлөөлөгчдөөс гадна Хүний аюулгүй байдлын судалгааны төвийн төлөөлөл, Нийгмийн даатгалын ерөнхий газрын зөвлөлийн гишүүд оролцов. Энэ үеэр НДБХГ-ын ахлах мэргэжилтэн Б.Батжаргал “Нэг цонхны үйлчилгээг нэвтрүүлж буй байдал” сэдвээр, ЭМДГ-ын Бодлого төлөвлөлтийн хэлтсийн дарга Ц.Ганцэцэг “Эрүүл мэндийн даатгалын хуулийн шинэчлэл” сэдвээр илтгэл тавьж Нийгмийн даатгалын тогтолцоо болон нэг цонхны үйлчилгээний талаар сонирхсон асуултанд нь хариу өглөө. Төлөөлөгчдийн хувьд Нийгмийн даатгалын цахим машины ажиллагаатай танилцаж “Шууд авч ашиглаж болох туршлага байна, төрийн үйлчилгээг хялбарчилсан чухал үйлчилгээ юм байна” гэдгийг хэлж байлаа.
Манай улсад 2006 оны 10 дугаар сард анхны нэг цэгийн үйлчилгээг Сүхбаатар дүүрэгт нэвтрүүлсэн ба найман жилийн турш үндэсний хэмжээнд төсөл хэрэгжүүлсний үр дүнд нийт 45 нэг цонхны үйлчилгээ үзүүлэгч нэгж байгуулагдсан байна. Үүн дээр нэмээд төрийн болон хувийн хэвшлийн аж ахуйн нэгжүүд өөрсдийн санаачилгаар 152 нэгж ажиллуулж байна. Ийнхүү манайд нэг цонхны үйлчилгээ ахицтай хөгжиж байгаа тул Бутан, Зүүн өмнөд Азийн Тайланд, Индонез, Камбож, Киргиз, энэ удаад Мьянмарын төлөөлөгчид туршлага судалж буй нь энэ юм. Бүгд найрамдах Мьянмарын Холбооны Улсын хувьд улсын хэмжээнд 1-2 тооны л нэг цонхны үйлчилгээ үзүүлдэг буюу бараг хөгжөөгүй гэж хэлж болохоор байдаг аж. Иймд төрийн үйлчилгээг хөнгөн шуурхай, чанартай хүргэх зорилгоор ерөнхийлөгч, Засгийн газрынхаа тухайлсан дэмжлэгтэйгээр энэхүү туршлага судлах айлчлалыг хийж байгаа юм байна. Тус улс нь 52 сая хүн амтай. Ард түмэн нь 135 ястан, үндэстнээс бүрддэг тул нэг цонхны үйлчилгээг нэвтрүүлэхэд хэлний асуудлыг хэрхэн шийдэхээс авахуулаад асуудал их байгаа талаар дурдаж байв.
“Дан ганц нэг цонхны үйлчилгээ биш, Нийгмийн хамгааллын суурь тогтолцоог Зүүн өмнөд Азийн орнуудын дундаас харьцангуй сайн бүрдүүлж, хөгжүүлж чадсан танай улсаас энэ салбарын туршлагыг судлах, хамтран ажиллах хүсэл сонирхол их байна” гэж энэ үеэр Мьянмарын төлөөлөгчдийн ахлагч тус улсын Дотоод хэргийн яамны Ерөнхий захиргааны газрын дэд дарга Тин Минт онцолж байсан юм.
