Засгийн газрын 2016-2020 оны үйл ажиллагааны хөтөлбөрт тусгагдсан тэтгэвэр авагчийн тэтгэврийн зээлийн хүүг бууруулах зорилтын хүрээнд тэтгэвэр авагчдын тэтгэврийг хугацаанд нь шуурхай олгох, тэтгэвэр авагч өөрийн сонгосон банкаар тэтгэврээ авах боломжийг бүрдүүлэх зорилгоор Эрүүл мэнд, нийгмийн даатгалын ерөнхий газраас 2016 оны 11 дүгээр сарын 15-ны өдрөөс эхлэн тэтгэвэр авагч өөрийн сонгосон банкаар тэтгэврээ авах ажлыг эхлүүлээд байна.

Уг арга хэмжээг улсын хэмжээнд 2 үе шаттай зохион байгуулж байгаа бөгөөд 2016 оны 11 дүгээр сарын 15-ны өдрөөс эхлэн шинээр тэтгэвэр тогтоолгох иргэдийн тэтгэврийг сонгосон банкаар нь, 2016 оны 12 дугаар сарын 15-ны өдрөөс эхлэн нийт тэтгэвэр авагчдаас банкаа солих хүсэлтийг нь хүлээн авч шийдвэрлэж байна.

Энэхүү ажлын хүрээнд тэтгэвэр авагч банкаа сонгох, өөрчлөх хүсэлтийг төв, орон нутгийн Эрүүл мэнд, нийгмийн даатгалын хэлтсүүд хүлээн авч, хүсэлт гаргасан тухай бүр шийдвэрлэн ажиллаж байна.

Мөн энэ ажлын хүрээнд ХААН банк, Төрийн банк, Худалдаа хөгжлийн банк, Үндэсний хөрөнгө оруулалтын банктай хамтран 11 аймаг, дүүргийн 70 суманд тэтгэвэр олгох данс шинээр нээж тэтгэвэр авагч өөрийн сонгосон банкаар үйлчлүүлэх боломжийг бүрдүүллээ.

Дээрх ажлын үр дүнд өнөөдрийн байдлаар улсын хэмжээнд нийтдээ 17460, үүнээс шинээр тэтгэвэр тогтоолгосон 8690 иргэн, тэтгэвэр авч байсан 8770 тэтгэвэр авагч банкаа өөрчлөн, өөрийн хүссэн банкаар дамжуулан тэтгэврээ авч байна.