Монгол Улсын нийгмийн хамгааллын салбарын хэлэлцээр бүхий орнуудын хамрах хүрээ улам бүр өргөжин тэлж байна. Хамгийн сүүлд Монгол Улс Бүгд Найрамдах Польш Улс хоорондын Нийгмийн хамгааллын тухай хоёрдугаар шатны хэлэлцээрийг 2016 оны 04 дүгээр сарын 25-ний өдрөөс 2016 оны 04 дүгээр сарын 28-ны өдрүүдэд Улаанбаатар хотноо зохион байгууллаа.
Монгол Улсын талын төлөөлөгчдийг Хүн амын хөгжил, нийгмийн хамгааллын яамны Нийгмийн хамгааллын бодлогын хэрэгжилтийг зохицуулах газрын дарга Л.Мөнхзул, Бүгд Найрамдах Польш Улсын талын төлөөлөгчдийг тус улсын Гэр бүл, хөдөлмөр, нийгмийн бодлогын яамны Нийгмийн хамгааллын тогтолцоог зохицуулах газрын дарга Робэрт Вуйчик нар тэргүүлэн хэлэлцээрийн төслийг нарийвчлан авч үзэж, харилцан тохиролцсоны үндсэн дээр БНПУ-ын нийслэл Варшав хотноо хоёр орны Нийгмийн хамгааллын асуудал хариуцсан сайд нар үзэглэхээр шийдвэрлэв.
Түүний дараагаар Монгол Улсын Их Хурал, Бүгд найрамдах Польш улсын парламентаар тус тус соёрхон баталснаар хүчин төгөлдөр мөрдөгдөж эхлэх юм.
Хоёр орны хооронд нийгмийн хамгааллын хэлэлцээр байгуулагдсанаар Монгол улсаас БНПУ-д ажиллаж амьдарч буй 1000 гаруй иргэдийн нийгмийн хамгаалалын асуудал шийдвэрлэгдэх юм. Өөрөөр хэлбэл Польшийн Нийгмийн даатгалын байгууллагаас тэтгэвэр, тэтгэмж тооцоход Монгол улсад ажиллаж, нийгмийн даатгалын шимтгэл төлсөн хугацаа тооцогдох, Монгол улсын Нийгмийн даатгалын байгууллагаас тэтгэвэр тэтгэмж тооцож олгоход БНПУ-д ажилласан хугацаа тооцогдон эрх үүсэх таатай боломж бүрдэх юм.
