Холбооны бүгд найрамдах ардчилсан Этиоп улсын төлөөлөгчид өнөөдөр /2015.09.03/ Нийгмийн даатгалын ерөнхий газарт хүрэлцэн ирж, туршлага судлав.
Тус айлчлалын багт Этиоп улсын Уул уурхайн сайд, яамны мэргэжилтнүүд, дөрвөн бүсийнх нь уул уурхай эрчим хүч хариуцсан менежерүүд багтсан ба Монгол улсад уул уурхай ямар түвшинд хөгжиж байгаа болон бичил уурхай эрхлэгчидээ хэрхэн зохицуулж ирсэн талаар туршлага судлах зорилготой ажээ. Уулзалтын үеэр Монгол улсын нийгмийн даатгалын тогтолцооны талаар Хяналт шинжилгээ үнэлгээний газрын түр орлон гүйцэтгэгч М.Энхтуяа мэдээлэл өгсөн бол Сургалт сурталчилгаа олон нийттэй харилцах албаны мэргэжилтэн Э.Баасанжалба бичил уурхай эрхлэгчдийн нийгмийн хамгаалал, тэдгээрийн нийгмийн даатгалын хамрагдалтын талаар мэдээлэл өгөв.
Манай улсын 19 аймгийн 150 гаруй суманд нүүрс, алт, жонш, гянтболд, жонш, элс хайрга, гөлтгөнө, давс, цагаан шүр зэргийг гар аргаар олборлодог 150 мянга орчим иргэн байдгаас албан ёсны бүртгэлтэй бичил уурхай эрхлэгч 8000 гаруй байдаг байна. Тэдгээрийг даатгалд хамруулж үүсч болох гэнэтийн эрсэдлээс хамгаалах, нийгмийн хамгааллыг нь бэхжүүлэх чиглэлээр 2012 оноос Швейцарын хөгжлийн агентлагтай хамтран ажиллах болсон юм. Бичил уурхай эрхлэгчидийн нөхөрлөл болгон дээр, уурхайн ам бүр дээр очиж идэвхтэй сургалт зохион байгуулснаар тухайн онд даатгалд хамрагдсан бичил уурхай эрхлэгчдийн тоо 4800 байснаа 2014 онд 7952 болж өссөн талаар энэ үеэр дурдсан. Тэдний албан айлчлал энэ сарын 1-10-ны өдрүүдэд үргэлжлэх бөгөөд манай улсын салбарын яам, Ашигт малтмалын газар, Үндэсний статистикийн хороо, Монголбанк зэрэг газруудад албан уулзалт хийхээр товлосноос гадна Баянхонгор, Өвөрхангай, Төв аймаг болон Налайх дүүрэгт байрладаг уурхай дээр очиж газар дээр нь танилцах юм байна.
